स्वरूप भजनावली

27.

वैराग्य संदीपनी (गोस्वामी तुलसीदास)

मंगलाचरण एवं भगवद् स्वरूप का वर्णन

राम वाम दिशि जानकी लखन दाहिनी ओर।
ध्यान सकल कल्याणमय सुरतरु तुलसी तोर ।।1।।
तुलसी मिटै न मोह तम किये कोटि गुण ग्राम।
हृदय कमल फूलै नहीं बिनु रविकुल रवि राम।।2।।
सुनत लखत श्रुति नयन बिनु रसना बिनु रस लेत।
वास नासिका बिनु लहे, परसे बिना निकेत।।3।।
अज अद्वैत अनाम अलख रूप गुण रहित जो।
माया-पति सोई राम दास हेतु नरतन धरेउ।।4।।
तुलसी यह तन खेत है, मन वच कर्म किसान।
पाप पुण्य द्वैबीज है बबै सो लवै निदान।।5।।
तुलसी यह तन तवा है, तपत सदा त्रैताप।
शान्ति होय जब शान्ति पद, पावै राम प्रताप।।6।।
तुलसी बेद पुराण मत, पूरन शास्त्र विचार।
यह विराग संदीपनी, अखिल ज्ञान को सार।।7।। 
*************************
संत स्वभाव का वर्णन
सरल बरन भाषा सरल, सरल अर्थ मय मानि।
तुलसी सरलै संतजन ताहि परी पहिचानि।।8।।
अति शीतल अति ही सुखदाई। सम दम राम भजन अधिकाई।।
जड़ जीवन को करै सचेता जग महँ विचरत हैं एहि हेता।।
तुलसी ऐसे कहूँ कहूँ, धन्य धरनि वह संत।
परकाजे परमारथी प्रीति लिये निबहंत ।।10।।
की मुख पट दीन्हे रहै, यथा अर्थ भाषंत।
तुलसी या संसार में, सो विचार युत संत।।11।।
बोले वचन विचारि कै, लीन्हें संत सुभाव।
तुलसी दुख दुर्वचन के, पंथ देत नाहिं पाँव।।12।।
शत्रु न काहू करि गनै, मित्र गनै नहिं काहि।
तुलसी यह मत संत को, बोलै समता मांहि।।13।।
अति अनन्य गति इन्द्री जीता, जाको हरि बिनु कतहुँन चीता।
मृगतृष्णा सम जग जिय जानी, तुलसी ताहि संत पहिचानी।।14।।
एक भरोसो एक बल, एक आस विश्वास।
राम रूप स्वती जलद चातक तुलसीदास।।15।।
सो जन जगत जहाज है, जाके राग न दोष।
तुलसी तृष्णा त्यागि के गहै शील सतोष।।16।।
शील गहानि सबकी सहनि, कहनि हीय मुख राम।
तुलसी रहिये यहि रहनी, संत जनन को काम।।17।।
निज संगी निज सम करत, दुरजन मन दुख दून।
मलियाचल है संतजन, तुलसी दोष बिहून।।18।।
कोमल वाणी संत की स्रवत अमृत मय आय।
तुलसी ताहि कठोर मन, सुनत मैन होई जाय।।19।।
अनुभव सुख उत्पति करत, भय भ्रम धरै उठाय।
ऐसी वाणी संत की, जो उर भेदे आय।।20।। 
तुलसी कोटि तपन् हरै जो कोउ धारै कान।।21।।
पाप ताप सब शूल नशावे, मोह अंध रवि वचन बहावै।
तुलसी ऐसे सद्गुन साधू, वेद मध्य गुण विदित अगाधू।।22।।
तन करि मन करि वचन करि, काहू दूखत नाहि।
तुलसी ऐसे संतजन राम रूप जग माहिं।।23।।
मुख दीखत पातक हरै, परसत कर्म बिलाहिं।
वचन सुनत मन मोह गत, पूरब भाग मिलाहिं।।24।।
अति कोमल अरु विमल रूचि मानस में मल नाहिं।
तुलसी रत मन होई रहे, अपने साहिब माहिं।।25।।
जाके मन तैं उठि गई, तिल तिल तृष्णा चाहि।
मानसा वाचा कर्मणा, तुलसी बंदत ताहि।।26।।
कंचन कांचहि सम गनै, कामिनी काष्ट पाषाण।
तुलसी ऐसे संत जन, पृथ्वी ब्रह्म समान।।27।।
कंचन को मृतिका करि मानत, कामिनी काष्ठशिला पहिचानत।
तुलसी भूलि गयो रस एहा, ते जन प्रकट राम की देहा।।28।।
अकिंचन इन्द्रिय दमन, रमन राम इकतार।
तुलसी ऐसे संतजन विरले या संसार।।29।।
अहंवाद मैं तैं नहीं, दुष्ट संग नहि कोय।
दुखते दुख नहीं ऊपजै, सुखते सुख नहीं होय।।30।।
सम कंचन कांचै गिनत शत्रु मित्र सम दोई।
तुलसी या संसार में कहत संत जन सोई।।31।।
बिरले बिरले पाइये माया त्यागी संत।
तुलसी कामी कुटिल कलि, केकी केक अनंत।।32।।
मैं तै मेट्यी मोह तम उग्यो आतम भानु।
संतराज सोइ जानिये, तुलसी या सहिदानु।।33।।
*************************
।।संत महिमा का वर्णन।।
को बरनै मुख एक, तुलसी महिमा संत की।
जिन्ह के विमल विवेक, शेष महेष न कहि सकत।।34।।
महि पत्री करि सिंधु मसि, तरु लेखनि बनाई।
शाीतल वाणी संत की, सासिहू ते अनुमान।
तुलसी गनपति सो तदपि, महिमा लिखी न जाय।।35।।
धन्य धन्य माता पिता, धन्य पुत्रवर सोय।
तुलसी जो रामहि भजै, जैसे कैसेहुँ होय।।36।।
तुलसी जाके वदन ते, धोखेहुँ निकसत राम।
ताके पग की पगतरी, मेरे तन को चाम।।37।।
तुलसी भगत सुपच भलो, भजै रैन दिन राम।
ऊँचे कुल केहि काम को, जहाँ न हरि को नाम।।38।।
अति ऊँचे भूधरनि पर, भुजगन को स्थान।
तुलसी अति नीचे सुखद, ऊख अन्न अरू पान।।39।।
अति अनन्य जो हरि को दासा, रटे नाम निशि दिन प्रति स्वासा।
तुलसी तेहि समान नाहिं कोई, हम नीके देखा सब कोई।।40।।
जदपि साधु सबही विधि हीना, तदपि समता के न कुलीना।
यह दिन रैन नाम उच्चरै, वह नित मान अगिनि मंह जरै।।41।।
दास रता एक नाम सों, उभय लोक सुख त्यागि।
तुलसी न्यारो रहै, दहै न दुख की आगि।।42।।
*************************
।।शान्ति स्वरूप का वर्णन।।
रैन को भूषण इन्दु है, दिवस को भूषण भानु।
दास को भूषण भक्ति है, भक्ति को भूषण ग्यानु।।43।।
ग्यान को भूषण ध्यान है, ध्यान को भूषण त्याग।
त्याग को भूषण शन्ति पद, तुलसी अमल अदाग।।44।।
अमल अदाग शान्ति पद सारा, सकल क्लेश न करत प्रहारा।
तुलसी उर धारे जो कोई, रहै आनंद सिन्धु मँह सोेई।।45।।
विविध पाप संभव जो तापा, मिटहिं दोष दुख दुसह कलापा।
परम शान्ति सुख रहे समोई, तहँ उत्पात न भेदे आई।।46।।
तुलसी ऐसे शीतल संता, सदा रहै एहि भांति एकंता।
कहा करै खल लोग गुजंगा, कीन्हों गरलशील जो अंगा।।47।।
अति शीतल अतिहि अमल, सकल कामनाहीन।
तुलसी ताहि अतीत गनि, वृत्ति शान्ति लयलीन।।48।।
जो कोई कोप भरे मुंख बैना, सन्मुख हतै गिरा सर पैना।
तुलसी तऊ लेस रिस नाही, सो शीतल कहिये जग मांही।।49।।
सात दीप नौ खंड लौ, तीन लोक जग मांहि।
तुलसी शान्ति समान सुख, अपर दूसरो नाहिं।।50।।
जहाँ शान्ति सद्गुरु की दई, तहाँ क्रोध की जड़ जरि गई।
सकल काम वासना बिलानी, तुलसी वहै शान्ति सहिदानी।।51।।
तुलसी सुखद शान्ति को सागर, संतन गायो करन उजागर।
तामे तन मन रहे समोई, अहं अग्नि नहि दाहे कोई।।52।।
अहंकार की अग्नि में, दहत सकल संसार।
तुलसी बाँचे संतजन, केवल शान्ति आधार।।53।।
महाशान्ति जल परसि कै, शान्त भये जन जोइ।
अहं अगिनि ते नही दहै, कोटि करै जो कोइ।।54।।
तेज होत तन तरनि सों, अचरज मानत लोय।
तुलसी जो पानी भया, बहुरि ना पावक होय।।55।।
जद्यपि शीतल सम सुखद, जग में जीवन प्रान।
तदापि शान्ति जल जनि गिनौ, पावक तेज प्रमान।।56।।
जरै बरै और खीझि खिझावै, राग द्वेष मँह जनम गँवावै।
सपनेहु शान्ति नहीं उन देही, तुलसी जहाँ जहाँ व्रत एही।।57।।
सोई पंडित सोह पारखी, सोई संत सुजान।
सोई सूर सचेत सो, सोई सुमट प्रमाण।।58।।
सोइ ज्ञानी सोइ गुनी जन, सोई दाता ध्यानि।
तुलसी जाके चित्त गई, राग द्वेष की हानि।।59।।
राग द्वेष की अगिनि बुझानी, काम क्रोध वासना नसानी।
तुलसी जबहि शान्ति गृह आई, तब उरही उर फिरी दोहाई।।60।।
फिरी दोहाई राम की, गे कामादिक भाजि।
तुलसी ज्यो रवि के उदय, तुरत जात तम लाजि।।61।।
यह विराग संदीपनी, सुजन सुचित सुनि लेहु।
अनुचित वचन विचारि के, जस सुधारि तस देहु।।62।।